Ka nisur tashmë mbledhja e socialistëve në selinë rozë, ku pritet të diskutohen një sërë çështjesh, por fokusi kryesor mbetet ajo e Presidentit të ri të Republikës. Në këtë mbledhje pritet që deputetët të depozitojnë emrat e propozuar nga ana e deputetëve për emrin e kreut të ri të shtetit.
Fjalën e parë në nisje të kësaj mbledhjeje e mori kreu i PS-së, njëherësh edhe kryeministri i vendit, Edi Rama. Kreu i qeverisë nuk i kurseu kritikat për presidentin Ilir Meta, ndërsa specifikoi disa nga elementët që duhet të ketë kreu i ri i shtetit.
“Mirëdita të gjithëve. Sot siç edhe jeni informuar, jemi mbledhur për të startuar dhe brenda grupit tonë parlamentar, procesin e identifikimit të kandidaturës më të përshtatshme për presidentin/en e republikës. Për herë të parë PS ka mundësi që ta zgjedhe e vetme presidentin, çka do të thotë se për herë të parë PS ka përgjegjësinë për cilësinë e kandidaturës. Në ,pamje të parë kjo duket sfidë e lehtë, po të kemi parasysh se thuajse çdo kandidaturë që mund të plotësonte disa kritere fare elementare, si përshembull njohjen e gjuhës shqipe, si përshembull emër me një karrierë profesionale, apo vetëpërmbajtjen në raport me ligjin dhe me Kushtetutën, do të ishte më e mirë se sa presidenti aktual i republikës së Shqipërisë. Nga ana tjetër, ajo çka e bën këtë moment shumë përcaktues për karakterin për ambicien e PS, është se nuk mjafton thjesht të zgjedhim një person që do të ishte më i përshtatshëm për atë rol se sa Ilir Meta. Gjë që do ta përmbyshnin si kriter 90% ë shqiptarëve. Por është që të zgjedhim një figurë për të luajtur në 5 vitet e ardhme rolin e kreut të shtetit që të rrezatojë normalitet.”, u shpreh Rama.