Sikurse paralajmëroi një ditë më parë nga Kuvendi, kryeministri Edi Rama ka mbajtur ‘premtimin’ teksa ka publikuar një video duke pirë ujë nga çezma. Mesazhi i Ramës shkon për deputeten e PD-së, Jorida Tabakun, e cila tha dje se uji që sjellë Ujësjellës Kanalizimet në Tiranë, nuk pihet.
“Sa i mirë, pini ujë Tiranë. Edhe ti Jorida, si tironse, duhet të pishë ujë Tirane”, thotë Rama.
Kryeministri nuk e la me kaq, teksa gjatë inspektimit të shtëpive në rindërtuara në Lezhë, nuk hezitoi të pinte ujë nga çezma edhe atje.
“Ku e keni çezmën, të pi ujë çezme meqë thonë që nuk pihet uji i çezmës në Lezhë. Jorida për të mira!”, u shpreh ai.
Ditën e djeshme, gjatë debateve në Parlament për marrëveshjen për një investim për ujësjellësin e Tiranës, Tabaku tha se cilësia e ujit në kryeqytet lë për të dëshiruar. E menjëhershme ishte edhe përgjigja e Ramës i cili i tha se do të publikonte video duke pirë ujë nga çezma, e madje i kërkoi Tabakut ta presë në shtëpi ‘se do pi edhe aty ujë nga çezma dhe do e bëj video dhe do e hedh në Tik-Tok’.