Kreu i PS-së, Edi Rama u zhvendos këtë të premte në qarkun e Dibrës, në fushatën përmbyllëse për zgjedhjet e 11 majit. Ai është në qytetin e Burrelit, ku bëri edhe prezantimin e investimeve 10-vjeçare në qarkun Dibër. “Drejt finishit për Shqipërinë 2030 në Bashkimin Europian”, shprehet kryeministri në postimin e tij në rrjetin social Facebook, në prag të nisjes së takimit.
Kurse ish-kryebashkiaku i Bashkisë së Matit, Agron Malaj, mbajti fjalën hapëse për këtë takim elektoral, ku renditi edhe investimet e realizuara në rreth gjatë një dekade.
“Sot rrethi i Matit është me 24 orë ujë. Kur e premtonim, njerëzit nuk e besonin, por investimet u realizuan. Kemi pasur mbështetje të fortë në arsim, shëndetësi, kulturë dhe të gjitha fushat e tjera. Më 11 maj i gjithë qarku i Dibrës dhe rrethit të Matit do mbështesi PS-në dhe Shqipërinë Europiane, ku theksoj atë që u bë për Rrugën e Arbrit, faleminderit dhe mirënjohje, sepse na afruat me Tiranën”, tha Malaj.