60 kompani ndërtimi janë në hetim nga prokuroria dhe policia në qytetin e Durrësit për shembjet e pallateve dhe godinave të tjera pas tërmetit tragjik të së martës së kaluar ku humbën jetën 24 persona nga 51 në total.
Kryeministri Edi Rama deklaroi në mbledhjen e dhjetë të jashtëzakonshme të qeverisë se janë 30 persona në grupin e hetimit të policisë kriminale bashkë me prokurorët që po mbledhin dokumentet për të vendosur para drejtësisë autorët e ndërtimeve abuzive.
E ndërsa po vijon mbledhja e fondeve nga donatorë të ndryshëm, Edi Rama tha se po bëhet gati një ligj special për rindërtimin, por ngriti shqetësimin e mungesës së fuqisë punëtore duke kërkuar përshpejtimin e procedurave për miratimin e ligjit që lejon marrjen e fuqisë punëtore nga jashtë nëse do të jetë e nevojshme. “Nuk mundet që rindërtimi të bëhet me procedura normale, prandaj është e rëndësishme të kemi një ligj të posaçëm për rindërtimin, duhet ta koordinojë si agjenci Fondi Shqiptar i Zhvillimit” tha Rama.
Kreu i qeverisë tha se në garë do të pranohen vetëm ato kompani që kaluan testin e tërmetit të 26 Nëntorit. “Duhet bërë edhe lista e kompanive që përmbushin parametrat e sigurisë që do të jenë pjesë e shortit për ti ftuar më pas në programimin e rindërtimit” tha ai. Por për zonat rurale, banorët që duan të ndërtojnë vetë shtëpitë, shteti u jep nga 2 mln lekë të reja në dorë (20 mln lekë të vjetra).
7400 persona deri tani janë në çadra, të cilat kryeministri kërkoi që të rikthehen sërish për t’u përdorur në raste të tjera emergjence. Ndërkohë që sot, u shpreh Rama, do të largohet nga Shqipëria për pak orë pasi duhet të jetë i pranishëm në ceremoninë e marrjes së Presidencës së OSBE-së nga Shqipëria në Bratislavë për t’u kthyer sërish nesër. Një tjetër pikë e rëndësishme e mbledhjes së sotme ishte edhe paketa anti-shqpifje, për të cilën Rama tha se do të kalojë në seancën e fundit në 19 Dhjetor me një klauzolë të vecantë për gjendjen e jashtëzakonshme, që përcakton një super dënim për ata që përhapin panik dhe lajme të rreme.