Kryeministri Edi Rama ka publikuar në rrjetet sociale fotoalbumin e ditës së djeshme nga takimet në Malësinë e Madhe dhe në Shkodër, në kuadër të zgjedhjeve vendore të 14 majit. “Uroj të bëjmë punë të mëdha me Benet Becin”, shkroi Rama në rrjetet sociale.
Kryesocialisti Rama u ndal fillimisht në Malësi të Madhe, ku bashkë me kandidatin PS-së në bashkinë e Malësisë së Madhe, Tonin Marinaj, Kryeministri Rama u ndal te arritjet në qeverisjen nga e majta, ndërsa ftoi qytetarët të votojnë PS-në për të ecur përpara. Rama bëri të ditur se “në Malësi të Madhe duhet të bëjmë një destinacion për ski që këtu të vijnë jo thjeshtë turistët që hipin nëpër male, por që të vijnë turistët që flejnë, konsumojnë e paguajnë shumë”.
Rama premtoi se “qeveria do të vijojë të investojë në sektorin energjetik për të bërë të mundur kthimin e Shqipërisë në një eksportuese neto të energjisë brenda 2028-ës”. Më tej Rama u ndal në një takim me profesionistë të fushave të ndryshme, ku biseduan mbi projektet e Becit për Shkodrën.
Gjatë takimit me gra dhe vajza në Shkodër, Rama tha se “me Benet Becin ne kemi bërë seriozisht një përpjekje për t’i dhënë Shkodrës një mundësi të re, një mundësi të mirë, një mundësi pa problem”.