Kryeministri i vendit, Edi Rama, mori pjesë në edicionin e tetë të takimit të Këshillit Europian të Korporatave, ku foli për rëndësinë e paqes, zhvillimit ekonomik dhe krijimit të mundësive për brezat e ardhshëm.
Në fjalën e tij, Rama e cilësoi pjesëmarrjen në këtë aktivitet si një nder dhe privilegj, duke vlerësuar platformën për bashkimin e ideve dhe njohurive nga burime të ndryshme.
Sipas kryeministrit, paqja nuk duhet parë vetëm si një rezultat diplomatik që i paraprin zhvillimit ekonomik, por si një kusht politik që e bën të mundur vetë zhvillimin.
Ai theksoi gjithashtu se progresi duhet të matet edhe përmes mundësive që shoqëria u krijon brezave të ardhshëm.
Kryeministri u shpreh se Evropa duhet të jetë më e hapur ndaj ideve dhe përvojave që vijnë nga vende të tjera, duke argumentuar se ekziston një pasuri e madhe njohurish dhe përvojash që ende nuk është përvetësuar dhe zbatuar sa duhet nga kontinenti evropian.
“Dua të them se është një nder i vërtetë dhe një privilegj t’ju bashkohem. Kjo platformë, e krijuar për të bashkuar dije që vjen nga burime të papritura, tregon gjithashtu diçka shumë të rëndësishme: kuptimin se paqja nuk është një arritje diplomatike që i paraprin zhvillimit ekonomik, por një kusht politik që zhvillimi ekonomik e bën të mundur.
Nuk duhet të harrojmë se masa e vërtetë e progresit është horizonti i mundësive që u lëmë atyre që vijnë pas nesh, dhe për këdo që vjen pas nesh, ky horizont mundësish nuk është vetëm vendi ynë, por bota jonë e përbashkët.
Ka kaq shumë gjëra që duhet t’i kuptojmë e t’i diskutojmë së bashku me njëri-tjetrin, dhe ka kaq shumë mençuri atje jashtë, të cilën Evropa nuk ka arritur ta përvetësojë dhe ta zbatojë“, tha Rama.