Rreth 60 minuta para mitingut përmbyllës të fushatës elektorale, kryeministri Edi Rama, me anë të një video në rrjetet sociale, shprehet se Tirana do të japi mesazhin e fundit për 11 majin. Ndërkohë, ai thotë se tashmë mezi pret për të parë votën e diasporës.
“Orët e fundit të këtij rrugëtimi erdhën. Pas pak, në 19:30, kemi Tiranën dhe vetëm Tiranën, të gjithë të tjerët kanë qendruar nëpër qarqet e tyre duke bërë përgatitjet e fazës tjetër të procesit. Tirana do të japë mesazhin e fundit të gjithë Shqipërisë dhe të gjithë shqiptarëve kudo që ndodhen.
Më vjen mirë që ka pasur një lëvizje ditët e fundit nga ata që ende nuk i kishin dërguar zarfet. Trendi na tregoi që do të kishim një pjesëmarrje të lartë. Unë jam shumë i lumtur që i dhamë mundësinë të votojnë dhe që ata e shfrytëzuan këtë mundësi.
Jam shumë i lumtur për këtë sfidë të Shqipërisë më 11 dhe tashmë jam shumë kurioz për të parë gjykimin e diasporës dhe patjetër me respektin më të madh. Në 19:30 do të jemi së bashku me Tiranën për Tiranën dhe për Shqipërinë në BE”, tha Rama.