Në konferencën e përbashkët me kryeministrin maqedonas, pas nënshkrimit të marrëveshjeve, Edi Rama foli edhe për ndryshimet kushtetuese që priten të ndodhin në Shkup, ku tha se populli është më i mençuar se politikanët dhe se nuk do të lejojnë që të rimerret peng vendi i tyre.
“Tani ndryshimet në Kushtetutë të kërkuara për Maqedoninë e Veriut, drejtësia dhe patriotizmi i shtirur mund t’ju kthejë në arsye për t’u përçarë mes vetit, ndërkohë që ky vend ka nevojë për të vrapuar si gjithë vendet e tjera.
Kushtetuta juaj ka një sërë minoritete të përcaktuara që do të thotë që është një model i njohur dhe që duhet plotësuar, nuk e di sa ndihmon, por ne kemi një model tjetër, ama ne kemi njohur në parlament një numër jo të vogël minoritetesh, përfshirë edhe atë bullgar, që e ka një prezencë të saj dhe nuk më duket se jemi të kërcënuar nga ndonjë minoritet, janë ura lidhëse, dhe për ne është absolutisht në interesin tonë, jo në interesin e tyre që të ndihen sa më mirë në vendin tonë dhe të mos ndejnë asgjë nga qytetarët me kombësi shqiptare.
Populli këtu është më i mençur se politikanët dhe nuk besoj se do ia fal kujt ligësinë e rimarrjes peng të Maqedonisë së Veriut, ndërkohë që kapërcimi është epokal. S’dua ta mendoj që Maqedonia e Veriut mund të kthehet në të shkuarën dhe të izolohet kur është ringritur dhe ka fituar një dinjitet të rëndësishëm kombëtar”, tha Rama.