Kryeministri Edi Rama ka postuar disa foto nga bujtinat në Theth, për të cilat thotë se janë mbushur me turistë që shijojnë natyrën dhe freskinë e zonës.
Kreu i qeverisë iu bën thirrje të gjithë atyre pushuesve të cilët bëjnë ecje dhe njëkohësisht hedhin kanaçe, bidon uji, apo paketë cigaresh në tokë, që të kenë kujdes dhe të mos ndotin mjedisin e natyrën e bukur shqiptare.
“Turizmi malor si asnjëherë më parë me bujtinat e Thethit të mbushura përplot nga turistët që vijnë prej gjithë botës për të shijuar natyrën e papërsëritshme dhe freskinë ndjellëse të këtyre ditëve fundgushti
Ama, ti që bën ecje shtigjeve atë kanaçen dhe paketën e cigares mos e hidh nëpër ferra, sepse lëndon atdheun e fëmijëve të tu, vendin e prindërve të tu, fytyrën e kësaj Shqipërie që bëhet me turp nga papastërtia e krijuar prej papërgjegjshmërisë tënde kaq të shëmtuar.”-shkruan Rama.