Kryeministri Edi Rama ka publikuar pamje nga operacionet për shuarjen e zjarreve në vend, duke bërë të ditur se në ndihmë të forcave në terren ka nisur aktivitetin edhe avioni i parë zjarrfikës.
Përmes një postimi në rrjetet sociale, kreu i qeverisë e cilësoi muajin gusht si një periudhë sfiduese për shkak të vatrave aktive të zjarrit, ndërsa theksoi se Shqipëria është më e përgatitur se më parë për përballimin e situatave të tilla.
“Avioni i parë zjarrfikës ka nisur aktivitetin si forcë e shtuar e këtij gushti sfidues, i cili na gjen më të fortë e të përgatitur se asnjëherë më parë, por edhe plotësisht të vetëdijshëm, për largqoftë rrezikun e përshkallëzimeve ekstreme të zjarreve përtej fuqive tona, siç po ndodh në disa vende të mëdha të Europës aktualisht”, shkroi Rama krahas videos së publikuar.
