Kryeministri Edi Rama ka reaguar në rrjetet sociale sot në 28 shkurt, në lidhje me punën që po bëhet për ndërtimin e Korridorit VIII (aksi Elbasan-Qafë Thanë).
Rama shprehet se në këtë aks rrugor po zhvillohet një punë e jashtëzakonshme e kolosale dhe se punimet janë të standardeve europiane.
Duke folur dhe njëherë për shembjen në aksin rrugor që lidh Librazhdin me Prrenjasin, Rama deklaron se shkak ka qenë rrëshqitja e tokës, pra gjeologjike dhe aspak standardet, me të cilat punohet.
Postimi i kryeministrit Rama:
MIRËMËNGJES
dhe me këtë vëzhgim të bërë dje në kantierin e aksit të ri të Korridorit VIII (Elbasan – Qafë Thanë), ku po bëhet një punë kolosale e shembullore e standardeve europiane, ndërkohë që 700 tenxheret politike mediatike e mbytën miletin me bombat artizanale mbi segmentin prej disa qindra metrash të rrugës së vjetër, të cilën e bllokoi rrëshqitja e tokës, pa asnjë lidhje, hiç, zero, me investimin e ri madhor, ju uroj fundjavë të qetë dhe larg tenxhereve të qametit artificial
Kujtojmë se shembja e një pjese të aksit rrugor që lidh Librazhdin me Prrenjasin, bëri që jug-lindja e vendit të jetë e bllokuar prej disa ditësh.
Për këtë problematikë, kishte edhe një replikë të ashpër mes kryeministrit Edi Rama dhe kryedemokratit Sali Berisha. Rama shprehet se shkaku për problemin në fjalë ishte natyror, ndërsa Berisha deklaronte se shkak ishte korrupsioni në ndërtimin e rrugëve.
Qeveria shqiptare ka nisur riparimin e aksit problematik, ndërsa nuk është dhënë një datë se kur do të përfundojnë punimet.