Në rrugën Ersekë-Leskovik vijojnë me ritme të larta punimet për rikonstruksionin e saj, përmes një fondi prej rreth 6 milionë euro, financuar nga qeveria shqiptare dhe BERZH. Kryeministri Edi Rama ndau pamje nga kantierë i punimeve, teksa e cilësoi këtë ask si një nga rrugët me peisazhet më të bukura të natyrës.
“Ersekë-Leskovik një nga rrugët me peizazhet më të bukura të natyrës, që do të ndeshni së shpejti e ku po punohet me ritëm për përfundimin”, u shpreh ai. Rruga është e gjatë 42.67 km, gjerësia e asfaltit ekzistues është rreth 4 m, ndërsa asfalti i ri do të jetë 5 m në të gjithë gjatësinë e rrugës.
Rikonstruksioni i rrugës Ersekë–Leskovik synon përmirësimin e ndërlidhjes mes rajoneve dhe lehtësimin e lëvizshmërisë drejt potencialeve turistike të rajonit të Korçës dhe Gjirokastrës, duke sjellë zgjerimin e ofertës turistike të rajonit dhe rritje të mundësive për zhvillim ekonomik të qëndrueshëm rajonal. Projekti i rikonstruksionit do të synojë të përmirësojë cilësinë dhe sigurinë e qarkullimit rrugor duke ruajtur gjurmën ekzistuese të rrugës.