Kryeministri Edi Rama deklaroi se Shqipëria ka kaluar nga sfidat bazike të shërbimeve publike në një fazë ku qytetarët kërkojnë standarde më të larta, duke e cilësuar këtë si një tregues të zhvillimit të shoqërisë.
Gjatë prezantimit të programit “Rilindja Urbane 2.0”, Rama solli shembuj nga transporti publik dhe menaxhimi i mbetjeve për të ilustruar ndryshimin e pritshmërive të qytetarëve ndër vite.
Sipas tij, para nisjes së programit të Rilindjes Urbane, transporti publik dominohej nga furgonët, ndërsa sot sfida nuk është më krijimi i linjave të autobusëve, por përmirësimi i cilësisë së shërbimit.
“Transporti publik, dikur përpara Rilindjes Urbane, furgonët ishin normaliteti. Lufta për t’i hequr furgonët ishte si një luftë për të luftuar COVID-in me grushte. Sot as nuk bëhet fjalë që ne të pretendojmë se njerëzit janë të kënaqur vetëm sepse ka linja dhe autobusë. Tashmë duhet një nivel tjetër,” u shpreh kryeministri.
Rama u ndal edhe te çështja e menaxhimit të mbetjeve, duke theksuar se edhe në këtë sektor prioritetet kanë ndryshuar.
“Dikur nuk ishte problem se si përpunoheshin mbetjet. Atëherë shqetësimi ishte se kur vinte makina e plehrave, që kalonte një herë në javë. Sot debati është se si përpunohen mbetjet,” tha ai.
Kryeministri foli edhe për perceptimin e qytetarëve ndaj institucioneve, duke theksuar se shoqëria shqiptare nuk është bërë më negative, por më kërkuese.
“Kush mendon se shoqëria është bërë më negative, nuk duhet të merret me politikë dhe as me punë që lidhen me shërbimin publik, sepse nuk përballon dot atë që e percepton si negativitet. Shoqëria është bërë më kërkuese, jo më negative. Mënyra se si i shpreh kërkesat është një temë tjetër,” deklaroi Rama.
Në përfundim, ai theksoi se rritja e cilësisë së shërbimeve publike është tashmë një domosdoshmëri për funksionimin e një shoqërie demokratike dhe të ekonomisë së tregut.
“Duhet të kalojmë patjetër në një nivel tjetër. Kjo nuk është më vetëm një çështje shërbimesh, por një çështje ekzistenciale për shoqërinë demokratike, ekonominë e lirë të tregut dhe një vend që bazohet te sipërmarrja,” përfundoi kryeministri.