Kryeministri Edi Rama u ka bërë thirrje emigrantëve shqiptarë që të kthehen në atdhe dhe të investojnë në Shqipëri. Në podkastin “Flasim”, Rama theksoi se vendi ka ndryshuar dhe është gati të mirëpresë ata që duan të kontribuojnë me përvojën dhe njohuritë e tyre.
Rama u shpreh se shpesh perceptimi për Shqipërinë është i errësuar nga lajmet negative, por realiteti është ndryshe:
“Shqipëria nuk është zi, jemi një vend tjetër. Sot vendi është i gatshëm të presë shumë më tepër emigrantë mbrapsht. Kush nuk provon, nuk realizon atë që dëshiron”, tha kryeministri.
Duke folur për përpjekjet kundër korrupsionit, Rama theksoi se ekspozimi i problemeve gjatë luftës ndaj korrupsionit ndikon përkohësisht në mënyrën si perceptohet situata:
“Kur korrupsioni luftohet realisht, perceptimi për një periudhë kohe rëndohet, sepse problemet dalin në dritë. Ekspozimi i korrupsionit kthehet në një temë që ndikon në perceptim”, deklaroi Rama.
“Kush nuk provon është e sigurt që nuk realizon, atë që do të donte. Kush provon edhe mund të dështojë, por them që Shqipëria është sot e gatshme për të pritur shumë më tepër emigrantë mbrapsht dhe nuk është Shqipëria ajo që duket nga TV, ku 90% të kohës dëgjon vetëm zi.
Këtë javë kemi diskutuar pse kur korrupsioni fillon luftohet realisht perceptimi për një periudhë të caktuar kohe rëndohet sepse fillon dhe ekspozohet, kthehet në një temë që ndikon në perceptim. Ndërkohë që jemi komplet një vend tjetër”, tha Rama.