Kryeministri Edi Rama thotë se është në mbështetje të Kosovës sa i përket dialogut me Serbinë. Përmes një postimi në X, ai shkruan se këtë mbështetje do ua tregojë personalisht në një vizitë zyrtare që do të bëjë personalisht në Prishtinë. Nuk ka detaje për këtë vizitë, pasi mes Kurtit dhe Ramës ka një ngrirje të raporteve.
“Nuk mund të jem më krenar për kontributin e vendosur dhe konkret të Shqipërisë në procesin e vështirë të normalizimit të marrëdhënieve ndërmjet Kosovës dhe Serbisë. Megjithatë, draft-statuti i ASMM-së i pranuar nga Kosova dhe Serbia si dokument i përshtatshëm pune është draft i BE-së.
Shqipëria do të mbështesë fuqishëm Kosovën në zbatimin e Marrëveshjes Themelore dhe do të vazhdojë të luajë rolin e saj në promovimin e paqes, stabilitetit dhe bashkëpunimit rajonal ndërmjet të gjitha vendeve të fqinjësisë sonë. Së shpejti do të shkoj në Prishtinë për të treguar personalisht mbështetjen time”, shkruan Rama.