Kryeministri Edi Rama është takuar me kancelarin e Gjermanisë, Olaf Scholz gjatë qëndrimit të tij në Berlin si pjesë e Kongresit të Partive Socialiste Europiane.
Kreu i qeverisë ka shpërndarë në rrjetet sociale disa foto nga takimi me Scholz dhe nuk dihet se çfarë kanë biseduar së bashku. Po ashtu, Rama bën me dije se do të jetë kancelari i Gjermanisë, ai i cili me anë të një fjalimi do të mbyllë këtë kongres.
“Dhe nga Berlini, ku sot në mesdite mbyllet me fjalimin e kancelarit Scholz, Kongresi i Socialistëve dhe Demokratëve Europianë, ju uroj një fundjavë të mbarë”, shkruan Rama.
Kujtojmë që një ditë më parë, Rama deklaroi në Kongresin e Partisë së Socialistëve Europiane që po zhvillohet në Berlin se në kushtet e krizës energjetike, Europa e bashkuar nuk duhet që ta braktisë Ballkanin Perëndimor, si në rastin e pandemisë së koronavirusit.
Partia e Socialistëve Europianë bashkon Partitë Socialiste, Socialdemokrate dhe partitë laburiste të BE-së, bashkë me vendet fqinje të Unionit, si Britania e Madhe si dhe partitë e majta të Ballkanit Perëndimor.