Në samitin e dytë të Komunitetit Politik Evropian (EPC) që po mbahet këtë të enjte në Kishnjev të Moldavisë, kryeministri Edi Rama është takuar me presidentin serb, Aleksandër Vuçiç kjo për të diskutuar mbi situatën në veri të Kosovës.
Të pranishëm në takim ka qenë presidentja e Greqisë, Katerina Sakellaropoulou, kryeministri i Maqedonisë së Veriut, Dimitar Kovaçevski dhe anëtarja serbe e Kryesisë së Bosnje Hercegovinës, Željka Cvijanović.
Ka qenë vetë Vuçiç që ka ndarë në fotot me Ramën. “Ne në rajon e dimë më së miri se sa e rëndësishme është që bashkërisht të bëjmë çdo përpjekje për të ruajtur paqen dhe stabilitetin e fituar me vështirësi. Diskutuam ngjarjet aktuale dhe hapat e mëtejshëm që do të kontribuonin në gjetjen e një zgjidhjeje për situatën aktuale të vështirë dhe serioze, me shpresën se arsyeja do të mbizotërojë, në të mirë të të gjithëve”, shkruan Vuçiç.
Presidentja e Kosovës Vjosa Osmani, akuzon presidentin Vuçiç se po mbështet bandat kriminale në veri të Kosovës dhe kërkon ndihmën e ndërkombëtarëve të ndihmojnë për të ndalur veprimet destabilizuese të Serbisë.
Nga ana tjetër Vuçiç u bëri thirrje autoriteteve të Kosovës që t’i tërheqin, siç i quajti ai, “kryetarët e supozuar” nga komunat me shumicë serbe në veri, për t’i ulur tensionet që kanë shkaktuar dhunë.