Kryeministri Edi Rama gjatë një bashkëbisedimi me mjekët dhe infermierët në Klos, ai vuri theksin te rritja e pagave që fazën e parë e ka këtë muaj.
“Pa e çuar në 60 mijë lekë pagën minimale prapë nuk e kemi bërë detyrën, por për këtë duhet të rrisim ekonominë, ju e patë raportin e fundit të Bankës Botërore sepse kemi ende të pashfryëzuar turzimin. Sot kemi të gjitha kapacitetet e prenotuara dhe patjetër aspekti tjetër është energjia, duke arritur të bëhemi sovranë më pas ato para do mbeten këtu dhe do investohen dhe do të rishpërndahen dhe nëse drejtuesja e qarkut tuaj do arrijë të na e çlirojë naftën dhe gazin nga kuçedra atëherë ne jemi komplet në një nivel tjetër. Shpresoj shumë të kemi lajme të mira në muajt në vijim, është në dorën e Belindës”,-tha Rama.
Duke qenë se një numër i lartë infermierësh dhe mjekësh janë larguar jashtë vendit, Rama theksoi edhe se në Gjermani, Itali apo vende të tjera jetesa është shumë e shtrenjtë dhe ndryshe nga këtu, pavarësisht rrogës së lartë, nuk mbeten para për të mbyllur muajin.
“Të mos të flasim pastaj se atje me dasht me pi një kafe tamam kafe, merr lek sa të dush nuk e gjen siç e gjen këtu. Muhabetin në kafe pastaj harroje fare, kështuqë…Jo po janë pjesë të jetës këto, nuk është njeriu robot, ul kokën puno dhe pastaj shko i rraskapit në shtëpi dhe vetëm flej gjumë se do çohesh të nesërmen dhe ndërkohë s’del dot nga shtëpia se po dole do paguash sa del. Jeta atje është tmerrësisht e shtrenjtë, nuk është më as Gjermania as Italia e viteve ’90, po ikin italianët nga Italia”,-tha Rama.