Kryeministri Edi Rama i bën thirrje Albin Kurtit, që të dalë nga guacka e vetizolimit dhe mos ta humbasë veriun e Kosovës, duke parë kudo armiq dhe tradhëtarë. Reagimi i Ramës vjen për mbajtjen ende në Serbi të tre policëve të Kosovës. Në një reagim të radhës në Twitter, Rama paralajmëron edhe Serbinë se nëse tre efektivët nuk lirohen, kjo do të jetë java e “rikthimit të akullit” mes dy vendeve.
“Nëse de-eskalimi nuk ndodh e humbura e madhe do të jetë Kosova sepse Serbia mbase nuk jeton dot pa u ri-izoluar! Druaj shumë se sa më shumë Albini këmbëngul në të tijën kundër aleatëve, aq më shumë situata mund të agravohet, duke rikthyer KFOR-in në krye të punës”,-shkruan Rama në një postim në Twitter.
Postimi i plotë
Sa më shumë mbahen në Serbi këta tre burra që edhe sikur ta kenë shkelur vijën e kufirit s’kanë kryer asnjë krim, aq më pak do jetë e mundur që marrëdhëniet tona bilaterale të mos bëjnë shumë hapa mbrapa! Kjo do jetë java e rikthimit të akullit mes nesh nëse ata nuk lirohen!
Nga ana tjetër nëse de-eskalimi nuk ndodh e humbura e madhe do të jetë Kosova sepse Serbia mbase nuk jeton dot pa u ri-izoluar! Druaj shumë se sa më shumë Albini këmbëngul në të tijën kundër aleatëve, aq më shumë situata mund të agravohet, duke rikthyer KFOR-in në krye të punës.
E atëherë lamtumirë për kushedi sa kohë edhe kontrollit formal të shtetit mbi krejt territorin dhe ta gëzojmë një Republikë të KFOR-it në Veriun e Kosovës! Albin dil nga guacka e vetizolimit dhe mos e humb Veriun duke parë kudo armiq e tradhëtarë! Koha është tani dhe po fluturon!