Kryeministri Edi Rama, në një takim me përfaqësues të biznesit të madh në Durrës, iu bëri thirrje sipërmarrësve që t’i trajtojnë me dinjitet punonjësit dhe të rritin nivelin e pagave.
“Trajtimi dinjitoz i punonjës nuk duhet të jetë problem, por zgjidhja. Të rrisin pagat dhe të mbajnë të paprekur kapitalin njerëzor, sepse kur të humbasin kapitalin njerëzor, do humbasin gjithçka. Ne do bëjmë tonë për këtë pjesë. Jetojmë në një sistem që nuk ia lejon qeverisë, por kjo është çështje e konkurrencës. Po nga ana tjetër ne nuk mund të rrimë të bëjmë sehir, që kompani të caktuara nuk i trajtojnë mirë punonjësit. Në vitin 2030, synimi është që Shqipëria të mos ketë pagë më të vogël se 60 mijë lekë.”, tha Rama.
Më tej, kreu i qeverisë tha se qeveria do t’i çojë të ardhurat për frymë në 10 mijë euro, një premtim që e bën vetëm pak ditë pasi deklaroi se do të çojë pagën mesatare të administratës në 900 euro.
“Nëse ne në këtë periudhë të qeverisjes tonë i kemi rritur të ardhurat për frymë në 6400 euro në total, nga 3300 ne duhet ta kemi të fiksuar që pa i çuar të ardhurat për frymë në 10 mijë euro, nuk kemi bërë atë që duhet. Unë jam i bindur që do ta arrijmë këtë, por do ta arrijmë duke ecur krah për krah me sipërmarrjen. Paga në sektorin publik ka shkuar në 900 euro, ky është një hap shumë i madh, por duhet të sigurohet edhe nga ecja e kompanive private”, u shpreh Rama.