Kryeministri Edi Rama ka folur për marrëdhënien e tij me George Sorros, të cilin e ka cilësuar si një personazh të jashtëzakonshëm dhe u shpreh se ka një raport fantastik me të.
Rama tha se Soros-in e ka njohur në Budapest para se t’i futej politikës, ndërsa shtoi se tashmë nuk takohet shpesh me të.
“Unë Sorrosin e kam njohur në vitet ’90. Më kanë futur në bordin e fondacionit të tij dhe kemi shkuar tek Ismail Kadareja, Aleko Minga, Brikena Çabej në mos gabohem. Dhe kemi shkuar në Budapest. Aty e kam njohur. Kam një raport fantastik me të. Gjithmonë kam patur një raport fantastik. S’ka lidhje me konspiracionet. Është një personazh i jashtëzakonshëm, përmbysi botën me atë goditjen që i bëri bursave. Në momentin që u bë i pasur, pasurinë e vet e vuri në shërbim të idesë së vet dhe është njeri që ka investuar pa fund për të ndihmuar shoqërinë e hapur. Tashmë takohemi rrallë, u shpreh Rama.