Kryeministri Edi Rama ka reaguar sërish lidhur me protestat e dhunshme që po zhvillohen prej disa ditësh në Tiranë, duke i cilësuar sulmet ndaj institucioneve dhe Policisë së Shtetit si pjesë të një lufte hibride, e cila, sipas tij, synon marrjen e pushtetit përmes dhunës.
Gjatë fjalës së tij, Rama deklaroi se pas protestës qëndrojnë persona të organizuar dhe të stërvitur për të nxitur përplasjet, ndërsa theksoi se dhuna nuk ka lidhje me të drejtën e nxënësve dhe studentëve për të protestuar.
Kryeministri u ndal te sulmi ndaj institucionit ku mbajti fjalën, duke treguar edhe një gur të shkëputur nga trotuari, të cilin e cilësoi si një mjet të rrezikshëm që mund të shkaktojë pasoja të rënda nëse hidhet në drejtim të efektivëve të policisë.
Sipas Ramës, përmes sulmeve synohet të krijohet përshtypja se protesta lidhet me problematikat e arsimit, ndërsa qëllimi i vërtetë, sipas tij, është të justifikohet dhuna dhe të arrihet marrja e pushtetit me forcë.
“Jemi këtu në këtë institucion që është bërë objekt i sulmit dhe në fakt i një agresioni të vërtetë me gurë të shkulur nga trotuaret e rrugës së Durrësit. Është vendosur në qendër të vëmendjes vetëm për një arsye, për të kamufluar ç’ka në të vërtetë është në burimin e helmuar të kësaj proteste. Për të krijuar idenë që kjo është një protestë për arsimimin dhe për të justifikuar këtë valë dhune që s’ka të bëjë as me nxënësit e as me studentët. Brenda atij grupi ka edhe studentë që janë të ekstremizuar në pikëpamjet e tyre, që u përkasin rrymave të reja të ekstremizmit politik, por problemi nuk janë asnjëherë studentët që ushtrojnë të drejtën e protestës. Këtu flasim për ushtrimin e dhunës. Kam marrë këtë gurin në dorë dhe kur imagjinon peshën që ky merr kur gjuhet drejt trupave të Policisë, është një armë që mund të shkaktojë edhe një tragjedi. Ky gur përcakton ku mbaron e drejta e protestës”, tha Rama.