Gazetari Erjon Skëndaj ka treguar sot në emisionin ‘Kjo Javë’ gjithë vështirësitë dhe shqetësimet, gjatë kohës që ka raportuar çdo ditë live nga QSUT, tek Infektivi.
Ai tha se situata në fillim ishte frikësuese për vetë faktin se druheshin nga e panjohura. Skëndaj tregoi dhe detaje të tjera, duke thënë se fqinjët i stepeshin, ndërsa vajza e vogël kërkonte ta përqafonte, por atij i duhej ta mbante larg, për shkak të frikës.
“Situata në fillim ka qenë goxha frikësuese, jo vetëm për mua, por për të gjithë kolegët. Frika më e madhe vinte nga e panjohura, ne dhe sot e kësaj dite na vijnë afër familjarë, kërkojnë ndihmë, informacion, na drejtohen ne dhe na afrohen. Detyroheshim t’i thoshim që duhet të mbajnë distancën. Mjaftonte një gabim i vogël dhe të gjitha masat e marra shkonin dëm. Nuk e kam bërë tamponin, atë duhet të na e bënte qeveria. Do isha kurioz ta bëja pasi doja të shihja, jo vetëm unë po gjithë kolegët. Fatmirësisht nuk pati asnjë të infektuar në rrethin tonë të gazetarëve. Kishte një lloj frike, madje dhe te komshinjë kur më shikonin, një lloj stepje një lloj distancimi. Vështirësia më e madhe ishte te familja, te vajza e vogël. Se ajo më vinte më afrohej dhe më duhej ta largoja. Mirëpo ajo është 10 vjeçe dhe filloi të lexonte të mësonte më shumë rreth virusit. Më thoshte t’i s’ke shenja, se unë e di çfarë shenjash ka ky virusi”.