Shtohet zërat e ndërkombëtarëve që kritikojnë fort opozitën që vendosi djegjen e mandateve. Ministria e Punëve të Jashtme të Gjermanisë e quan të gabuar djegien e mandateve të deputetëve të opozitës. Në një prononcim, Ministria e Punëve të Jashtme shprehet se “platforma e duhur për zgjidhjen e konflikteve politike është parlamenti.”
“Po i ndjekim me shumë vëmendje zhvillimet aktuale politike në Tiranë. Bojkotimin e Parlamentit dhe në veçanti dorëheqjen e deputetëve e konsiderojmë të gabuar. Platforma e duhur për të zgjidhur konfliktet politike është Kuvendi. Ngecja në vend nuk është opsion për Shqipërinë e sidomos kur Shqipëria është në pritje të vendimit të BE-së për çeljen e negociatave të anëtarësimit”, thuhet në deklaratë.
Më herët Shtetet e Bashkuara të Amerikës i kërkuan opozitës të mos lërë mandatet në masë. Departamenti Amerikan i Shtetit në reagimin e tij i kërkoi dy krerëve të partive të mëdha opozitare, të dënojnë dhunën e ushtruar gjatë protestës së 16 Shkurtit.