Motra e Emina Çunmulajt, Pepi Cunmulaj, e cila para pak ditësh kishte publikuar një foto ku puthte posterin e presidentit serb, Aleksandër Vuçiç ka reaguar sërish lidhur me këtë veprim. Ajo ka kërkuar falje publikisht pas kritikave të shumta që mori lidhur me foton që shpërndau në rrjet dhe ku krahas së cilës shkruante: “E ardhmja është e ndritur.”
Pepi, e cila jeton prej kohësh në Beograd, ka marrë vëmendjen e medias me këtë veprim megjithatë ajo nuk ka ngurruar të sqarojë gjithçka duke dhënë shpjegimin e saj. Me anë të një postimi në profilin e saj “Instagram”, ajo ka kërkuar ndjesë por thotë se postimi ka qenë në fakt një ironi dhe se asnjëherë nuk ka pasur për qëllim për të idealizuar figurën e tij.
“Më lejoni që të sqaroj postimin tim të fundit i cili është keqinterpretuar dhe publikuar nëpër media që pa të drejtë kundershtojne motrën time Emina Cunmulaj e cila ka bërë aq shumë dhe vazhdon të kontribuojë me shpirt për shqiptarët.
Unë kam bërë postimin me ironi ndonëse jetoj në një vend ku sarkazma ka konotacion tjetër, unë kam menduar se sarkazma ime do të kuptohet drejtë pa e menduar se mund të keqinterpretohet. Unë vij nga një familje patriotike dhe në asnjë moment nuk kam menduar të idealizoj një kriminel siç është Vuçiç.” u shpreh Pepi.
