Mish viçi me qumësht, një recetë e veçantë e shijshme dhe mbi të gjitha e shëndetshme, mund të qëndrojë dhe si pjatë më vete, por dhe mund të kombinohet me gatime të tjera.
Përbërësit
1 kg mish viçi i ndarë në copa të vogla, 4 lugë vaj ulliri, 2 thelpinj hudhër të grirë, 2 lugë majdanoz i grirë, piper i bluar, kripë, 1 gotë qumësht, gjysmë gote me lëng mishi.
Përgatitja
- Si fillim pastroni copat e mishit në mënyrë që të mos kenë dhjamëra.
- Në një tenxhere të thellë shtoni vajin e ullirit dhe thelpinjtë e hudhrës. Këtë tenxhere vendoseni në zjarr të avashtë, në mënyrë që vaji të mos digjet.
- Pasi të keni shpëlarë copat e mishit, shtojini në tenxhere për t’u skuqur lehtë. Marinojeni me kripë dhe piper, sasia e të cilëve është sipas dëshirës.
- Kur mishi të ketë marrë pak shije, shtoni qumështin dhe lëngun e mishit, në pamundësi të së cilit mund të përdorni edhe thjesht ujë. Diçka e tillë do ta lejojë mishin të përthithë erëzat që nevojiten në recetë.
- Mbulojeni pjesërisht me kapak dhe ziejeni në zjarr të ngadaltë, duke e përzierë shpesh, pasi qumështi tenton të ngjitet.
- Kur salca të jetë mpiksur, do të jetë formuar një krem i dendur, në këtë moment shtoni majdanozin e grirë hollë.
- Shërbeheni të ngrohtë në një pjatancë duke e spërkatur me hudhra të shtypura.