Nuk ka qetësi për refugjatët që nga Italia vijnë apo edhe po përgatiten që të vijnë në kampet e ndërtuara në Gjadër. Seksioni i imigracionit në gjykatën e Romës ka referuar në Gjykatën Evropiane të Drejtësisë çështjen e emigrantëve në Gjadër, duke pezulluar masën e vlefshmërisë së ndalimit.
“Meqenëse nuk ka vërtetim të arrestimeve të urdhëruara nga komisari i policisë së Romës brenda 48 orëve të kërkuara nga ligji, egjiptianët dhe bangladeshasit janë të lirë dhe, duke mos qenë në gjendje të qëndrojnë në Shqipëri, siç parashikohet në protokollin e nënshkruar nga Giorgia Meloni dhe Edi Rama , ata do të duhet të kthehen në Itali. Ata do të kthehen në Brindisi në orët në vijim”, shkruan La Repubblica.
Emigrantët, të cilët fillimisht ishin sjellë në Shqipëri nga anija Libra e Marinës Ushtarake Italiane, do të transportohen në Itali pas pezullimit të vendimit nga gjykata italiane. Vendimi për pezullim është bërë në pritje të një interpretimi nga Gjykata e Drejtësisë për përputhshmërinë me ligjet evropiane, duke vënë në pikëpyetje trajtimin e migrantëve sipas ligjit të imigracionit dhe protokollit mes Shqipërisë dhe Italisë.
Në deklaratën e saj, gjykata italiane thekson se çdo vendim për përkufizimin e një vendi si i sigurt duhet të jetë në përputhje me ligjet evropiane. Gjykata nënvizon detyrimin e autoriteteve kombëtare për të zbatuar standardet evropiane të drejtpërdrejta, përfshirë ato që kanë përparësi mbi ligjet kombëtare, siç parashikohet në Kushtetutën Italiane.