Kryeministri Edi Rama vijon që të flasë për mediat italine, në lidhje me marrëveshjen me Italinë për refugjatët që do të vijnë në Shqipëri. “Do të jetë një qendër pritjeje siç parashikojnë normat e BE-së. Shqipëria nuk mund të ofrojë zgjidhjen e çështjes por mund të japë një dorë nëse funksionon mirë”,-u shpreh më tej kryeministri për median italiane Tg2 Post.
“Nuk ka përgjigje të përbashkët as në BE dhe as brenda partive politike. Është normale që të ketë një larmi pikëpamjesh. Të mbyllësh gjithçka është e kotë. Hapja pa kriter mund të bëhet shumë e rrezikshme”, theksoi Rama.
Marrëveshja me Italinë për emigrantët që parashikon ngritjen e dy qendrave të pritjes një në portin e Shëngjinit dhe tjetra në Gjadër ka ngjallur debate si në Itali ashtu dhe në Shqipëri, ndonëse si Rama ashtu dhe Meloni e kanë mbrojtur atë duke u shprehur se marreveshja është në përputhje me konventat ndërkombëtare.
Sipas marrëveshjes në portin e Shëngjinit do të shërbejë si pikë e parë kontakti për grumbullimin e të dhënave. Më pas migrantët do të transferohen në qendrën e pritjes në Gjadër ku do të nisin procedurat ndaj kërkesave për azil do të duhet të përmbyllen brenda 28 ditëve. Të gjitha shpenzimet do të merren përsipër nga pala italianë. Ndërkohë numri maksimal i emigrantëve që do pranohen në një muaj është 3000.