Në Serbi regjistrimi i popullsisë po shoqërohet me probleme në Luginën e Preshevës. Në Medvegjë janë vetëm tre regjistrues me etni shqiptare, të cilët po marrin pjesë në procesin e regjistrimit të popullsisë. As këta tre shqiptarë nuk po dërgohen në vendbanimet shqiptare, por në dyert e tyre po trokasin regjistrues serbë.
Përfaqësuesit politikë të Luginës së Preshevës kanë ngritur shqetësimin, duke thënë se kjo është në kundërshtim me marrëveshjen që është bërë në ndërmjetësim me OSBE-në.
Këshilltarja e kryeministrit të Kosovës për Luginën e Preshevës, Ardita Sinani, u ka bërë thirrje qytetarëve shqiptarë të Medvegjës dhe të gjithë Luginës të bëhen pjesë e procesit për regjistrimin e popullsisë civile që po zhvillohet në Serbi. Sinani ka thënë se regjistrimi është i rëndësishëm edhe si kundërpërgjigje ndaj diskriminimit që vazhdueshëm të shqiptarëve në Luginë.
“Tregoni që ne jemi, ekzistojmë dhe do të jemi këtu gjithmonë në trojet tona“. Regjistrimi i popullsisë për shqiptarët në Serbi po bëhet pas dy dekadave. Shqiptarët e Luginës së Preshevës nuk kanë marrë pjesë në regjistrimin e popullsisë që u organizua në vitin 2011, për shkak se nuk u respektuan kërkesat e tyre.