Të moshuarit e qytetit të Burrelit, kanë tashmë në dispozicion një ambient të dedikuar ku mund të kalojnë kohën e lirë gjatë ditës në kushte më të mira. Projekti për rehabilitimin e Qendrës së të Moshuarve Mat është përfunduar me sukses dhe hapësira e re tashmë është vënë në shërbim të moshës së tretë.
Këtë të hënë u zhvillua ceremonia e hapjes zyrtare të qendrës, ku morën pjesë Deputeti z. Agron Malaj, Kryetari i Bashkisë Mat, z. Altin Bojni, si edhe përfaqësues të tjerë të institucioneve vendore.
Në fjalën e tij, Deputeti Agron Malaj u shpreh se krijimi i kushteve më të mira për moshën e tretë ka qenë gjithmonë një prioritet i Bashkisë Mat, që nga koha kur ai ka qenë në drejtimin e saj, duke shtuar se do të vijojë të mbështesë pushtetin vendor edhe në të ardhmen.
Nga ana e tij, Kryetari i Bashkisë Mat, Altin Bojni, theksoi se ky investim përmirëson ndjeshëm kushtet e qëndrimit për të moshuarit dhe përfaqëson një angazhim konkret të bashkisë për kujdesin ndaj kësaj shtrese të shoqërisë.
Qendra e të Moshuarve ndodhet pranë Pallatit të Kulturës, në Parkun “Mbretëresha Geraldinë”, në qytetin e Burrelit, duke ofruar një hapësirë të përshtatshme dhe të aksesueshme për komunitetin.