Kalaja e Gjirokastrës vijon të jetë ndër monumentet më të vizituara të trashëgimisë kulturore në vend, sidomos gjatë sezonit pranveror.
Sipas statistikave zyrtare të publikuara nga Drejtoria Rajonale e Trashëgimisë Kulturore në Gjirokastër, gjatë periudhës janar–maj, kalaja është vizituar nga rreth 58 mijë turistë vendas dhe të huaj, ndërsa vetëm në muajin maj, 30 mijë vizitorë kanë kaluar portat e kështjellës së gurit.
Turistët e huaj shprehen të mahnitur nga mikpritja dhe historia e qytetit të gurtë:
“Mendoj se vendi juaj dhe peizazhi janë të mrekullueshëm. Kemi eksploruar shumë zona të bukura dhe do të rikthehemi sërish. Kur të kthehemi në Francë, do t’u flasim miqve tanë për Shqipërinë,” – thotë një turiste.
“Jam shumë i mahnitur, si nga mikpritja, ashtu edhe nga vlerat historike që ka Gjirokastra. Nuk po gjej fjalë për ta përshkruar,” – shprehet një turist.
Në përgjigje të rritjes së interesit turistik, autoritetet kanë ndërhyrë në ripërtëritjen e sinjalistikës, pastrimin e zonës nga bimësia si dhe mirëmbahet në mënyrë të vazhdueshme monumenti i klasifikuar “i kategorisë së parë”.
“Vetëm në muajin maj kemi pasur 30 mijë vizitorë, me një rritje prej rreth 10% krahasuar me të njëjtën periudhë të një viti më parë. Kjo rritje është inkurajuese dhe na ngarkon me përgjegjësi për të përmirësuar shërbimet dhe infrastrukturën,” – u shpreh Ardis Duka, drejtor i DRTK Gjirokastër.
Përveç kalasë, turistët vizitojnë edhe pazarin karakteristik, shtëpitë muzeale dhe lagjet historike, duke bërë që Gjirokastra të mbetet një nga destinacionet kryesore të turizmit kulturor në Shqipëri.