Rrëzimi i qeverisë në Bullgari ka tronditur edhe aspiratat e Shqipërisë dhe Maqedonisë së Veriut për të marrë “dritën jeshile” për nisjen e negociatave të anëtarësimit me BE-në.
AP NEWS shkruan se ky vendim do të pengojë më tej përpjekjet e vendeve të Ballkanit për t’u bashkuar me unionin.
Partia opozitare e qendrës së djathtë GERB paraqiti mocionin javën e kaluar, duke akuzuar qeverinë për keqpërdorim të financave publike dhe politikës ekonomike dhe për dështimin për të trajtuar inflacionin në rritje. Votimi i mosbesimit kaloi me 123 vota pro, 116 kundër dhe 0 abstenim.
“Kryeministri Kiril Petkov formoi një koalicion qeveritar me katër parti në dhjetor. Ai ka kërkuar një zgjidhje për një mosmarrëveshje dypalëshe etno-kulturore që ka bllokuar përpjekjet e Maqedonisë së Veriut dhe Shqipërisë për t’u bashkuar me BE. Pushtimi rus i Ukrainës më 24 shkurt e ka shtyrë BE-në të shqyrtojë përshpejtimin e përpjekjeve të anëtarësimit në Ballkanin Perëndimor për të parandaluar Moskën të zgjerojë ndikimin e saj në rajon”, shkruan APNEWS.