Ministri i Jashtëm rus, Sergei Lavrov, në një video-konferencë me mediat serbe ka vlerësuar Serbinë, duke e lavdëruar atë për refuzimin e saj të sanksioneve kundër Moskës. Ai e konsideroi atë një “vendim të mençur”.
“Ne e respektojmë thellësisht popullin serb, kulturën serbe, historinë serbe dhe përkushtimin ndaj miqve tradicionalë”, ka thënë Lavrov.
“Ne jemi të sigurt se ata do të vazhdojnë të marrin vendime të mençura në këtë situatë”, shtoi ai.
Ndonëse Serbia ka votuar në të mirë të rezolutës së Kombeve ë Bashkuara që dënon pushtimin rus, Beogradi nuk u është bashkuar sanksioneve që Shtetet e Bashkuara dhe Bashkimi Evropian kanë vënë kundër Moskës.
Lavrov ka thënë se sanksionet “janë përpjekje e Shteteve të Bashkuara për të imponuar hegjemoninë e tyre” në Ballkan, dhe ka shtuar se Perëndimi është duke tentuar “të izolojë Rusinë”, në rajonin që ka përjetuar luftë shkatërruese në vitet 1990.
Presidenti rus, Vladimir Putin, ka urdhëruar pushtimin e Ukrainës më 24 shkurt.
Ai ka urdhëruar “operacion special” për të çmilitarizuar Ukrainën.
Veprimi i Kremlinit ka nxitur zemërim dhe është dënuar në shumë vende të botës.
Shtetet e Bashkuara dhe aleatët janë përgjigjur me sanksione të ashpra kundër Moskës.