Turqia zbulon edhe 85 miliard metër kub gaz në Detin e Zi duke e çuar në 405 miliard metër kub rezervën totale të gjetur nga anija sondë ”Fatih”. Ndonëse kërkimet në këtë zonë do të vazhdojnë, vëmendja do të përqëndrohet tashmë në detin Mesdhe.
Presidenti Erdogan u shpreh se nuk do të ketë tërheqje pavarësisht kërcënimeve ndërsa foli ashpër edhe për Bashkimin Europian.
“Paqja në Mesdheun Lindor kalon përmes njohjes së të drejtave të Turqisë dhe Qipros Veriore. Ne do të vijojmë në rrugën tonë dhe nuk do të pranojmë asnjë kërcënim bosh. Bashkimi Europian duhet të heqë dorë nga politika e njëanshme dhe standardet e dyfishta me vendin tonë.
Përndryshe, tensioni në Mesdhe do të sjellë fundin e BE-së që nuk është më një bashkim vlerash. Unioni u godit nga largimi i Britanisë së Madhe dhe tashmë po përpëlitet”, është shprehur Erdogan.
Në ujërat e Mesdheut u kthye pak ditë më parë anija sondë “Oruç Reis” e cila u tërhoq në portin e Antaljas për t’i dhënë një shans dialogut me Greqinë. Por në mungesë të një diskutimi në tryezë autoritetet turke urdhëruan rikthimin në kërkime për naftë dhe gaz me intensitetin e mëparshëm.