Mbledhje maratonë e Këshillit të Bashkisë Mat. Rezistencë e këshiltarëve të majtë dhe e banorëve të fshatrave Frankth, Gërman, Batërr e Madhe, Batërr e Vogël, Midhë e Muzhakë. Në fund këshilltarët me shumicë votash vendosën të mos miratojnë lejen për tjetërsimin e një sipërfaqe pyjore për llogari të një firme që kërkonte leje shfrytëzimi për mermer të gëlqerizuar.
Kryetari i Bashkisë Nezir Rizvani edhe në mbledhjen e tretë, të thirrur për këtë çështje, pranoi se nuk ishte në dijeni të projektit dhe nuk mund të shprehte gjykimin e tij në lidhje me miratimin ose jo të lejes.
Lexo edhe- Pesë fshatra kundërshtojnë ndërtimin e gurores në Qafë Shtamë
Sakaq këshilltarët u ndanë në mendimet e tyre. Shumica tha se kjo leje nuk duhet dhënë sepse dëmton rëndë mjedisin, shkatërron pyjet dhe infrastrukturën. Sipas tyre nuk ka përputhje të sipërfaqeve, nuk janë zhvilluar konsultime me banorët, ka mashtrime të banorëve të zonës.
Ndërsa banorët e revoltuar kërkuan nga këshilltarët të mbajnë qëndrim me votë kundër sepse kjo krahinë ka probleme të shumta, mbetjet e qytetit derdhen në territorin e Komsisë, uzina e ferrokromit krijon ndotje, ndërkohë pyjet, flora dhe fauna janë dëmtuar keq. Ndërtimi i kantierit të mermerit të gëlqerizuar thanë banorët krijon probleme të tjera në mjedis.
Në fund të debatave 13 nga këshilltarët e pranishëm votuan kundër ndërtimit të objektit dhe katër abstenuan. /tirananews.al/