Komisioni Parlamentar për Ekonominë, Financat dhe Punësimin miratoi sot rihapjen e procedurës për plotësimin e vakancës së mbetur në Këshillin Mbikëqyrës të Bankës së Shqipërisë.
Gjatë mbledhjes, kryetarja e komisionit Milva Ekonomi u shpreh se vendimi vjen në zbatim të ligjit “Për Bankën e Shqipërisë” dhe rregullores së Kuvendit, pasi vakanca vijon të mbetet e paplotësuar.
“Komisioni merr vendim për të shpallur vakancën, në mënyrë që të ketë aplikime të reja për pozicionin e anëtarit të Këshillit Mbikëqyrës të Bankës së Shqipërisë”, deklaroi Ekonomi.
Rihapja e procedurës vjen pasi në muajin shkurt seanca plenare nuk miratoi kandidaturën e Matilda Shehut, e propozuar nga një grup deputetësh të mazhorancës. Më pas, propozimi për kandidaturën e saj u tërhoq përfundimisht.
Në muajin shkurt, Kuvendi miratoi emërimin e katër anëtarëve të rinj të Këshillit Mbikëqyrës të Bankës së Shqipërisë. Selami Xhepa dhe Holta Zaçaj u propozuan nga Kuvendi, ndërsa Ervin Mete dhe Jonida Prifti nga Këshilli i Ministrave.
Në vijim, gjatë muajit mars, Kuvendi votoi edhe për vakancën e pestë, duke miratuar kandidaten Olta Rushaj, të propozuar nga Këshilli i Ministrave.
Në fund të dhjetorit të vitit që lamë pas përfundoi mandati i gjashtë anëtarëve të Këshillit Mbikëqyrës të Bankës së Shqipërisë, mes tyre zëvendësguvernatorja e parë Luljeta Minxhozi, si dhe anëtarët Ridvan Bode, Suela Popa, Edlira Luçi, Artan Hoxha dhe Violeta Staka.