Ndryshimi i “rregullave të lojës” nga Covid-19 për mbajtjen e evenimenteve, duket se i përket të shkuarës dhe tashmë çdo gjë po i kthehet normalitetit. Pas dy vitesh mungesë si pasojë e pandemisë, viti 2022 ka rikthyer dhe traditën e ceremonive të diplomimit për maturantët.
Më përfundimin e provimeve, gjimnazistët e shkollës së mesme “Qemal Stafa” u mblodhën te amfiteatri i liqenit të Tiranës për të festuar suksesin e 3 viteve.
Gjatë ceremonisë u shpërndanë çertifikata vlerësimi për nxënësit me arritjet më të larta. Të emocionuar maturantët nuk e fshehën entuziazmin për mbylljen me sukses të gjimnazit gjatë viteve të vështira të pandemisë. Me emocione për përfundimin e gjimnazit dhe ethet e rrugëtimit të ri që do të nisin, universitetin, puna e maturantëve më të mirë u shpërblye me çertifikata vlerësimi.
“Ky kurorëzim pas pandemisë dhe vështirësive është shumë i bukur. 3 vite kaluan shumë shpejt, jemi rritur së bashku e jemi bërë më të fortë për të ardhmen për të përballuar jeten… sfida të tjera na presin”, shprehen ata.
Përballë prindërve dhe mësuesve të tyre ata shprehën mirënjohjen për mbylljen me sukses të tre viteve të shkollës së mesme.