Pas ndeshjeve të Kupës që u luajtën në mesjavë, sot rikthehet Kategoria Superiore me takimin Partizani-Kastrioti që hap edhe javën e 21. Të kuqtë që vijnë si kryesues të kampionatit, do të synojnë më të mirën ndaj Kastriotit që ka qenë jo pak surprizë në këtë fillim viti ku ka mundur 1-5 Luftëtarin dhe 2-1 Skënderbeun.
Sa i përket gjykimit, kjo ndeshje i është besuar Kreshnik Cjapit i cili do të ndihmohet nga dy asistentët e tij, Ilir Tartari dhe Orgest Grabova, ndërkohë që Kridens Meta është përcaktuar si gjyqtar i katërt.
Dy skuadrat janë përballur shpesh herë bashkë këtë sezon, ku sot luajnë ndeshjen e pestë mes tyre, pasi 2 herë janë përballur në kampionat dhe dy herë të tjera në Kupën e Shqipërisë. Në të gjitha takimet e këtij sezoni, Partizani ka arritur të triumfojë duke numëruar në total 4 fitore.