Zëdhënësja e qeverisë, Ministrja e Shtetit për Marrëdhëniet me Parlamentin Elisa Spiropali ka publikuar në rrjetin e saj në Facebook një video-koment rreth vendimit drastik të opozitës për djegien e mandateve. Në këtë postim, Spiropali thekson se opozita e nxitur më së shumëti nga ish-kryeministri Sali Berisha ka frikë nga drejtësia e re.
“Për të vajtuar me kujë e për të qeshur me lot, ky teatër i madh dëshpërimi nga pafuqia për të fituar zgjedhjet e radhës dhe frikë nga pjella e mallkuar e reformës në drejtësi, prokuroria speciale antikorrupsion! E cila pasi u del ne ëndërr qyshse u detyruan të votojnë reformën, u është bërë hije tani që i erdhi ora te lindë prej vërteti”, thotë ajo.
Për zëdhënësen e qeverisë, “dëshpërimi e frika, e nxorrën përfundimisht jashtë kontrolli lidershipin opozitar dhe jashtë parlamenti pa kthim grupin tonë kundershtar. Pasi bëri vertikalen dhe horizontalen, për të justifikuar humbjen e zgjedhjeve te shkuara, Lulzim Basha s’kishte më asnjë mundësi të justifikonte atë të zgjedhjeve që vijnë. Kjo bashkë me plakun vizëhequr, që jep shpirt po nga zakoni i vjetër i zjarrvënësit dorë nuk heq, u bënë shkopi dhe baruti i shkrepses që dogji partinë qe solli parlamentarizmin ne Shqipëri”. Spiropali nuk la pa përmend me këtë rast edhe kryetaren e Lëvizjes Socialiste për Integrim Monika Kryemadhi për të cilën u shpreh “Monika u vajti pas megjithë shansin për të gjithë, duke shpresuar se këtë ekzil në humnerë e shkroi një dorë hyjnore nga qielli dhe jo dora e plakut të marrë. I cili nënshkroi tamam në 20 shkurt, plot 28 vjet nga shembja e shtatores se Enverit, ikjen e bustit të tij uroj pa kthim nga skena e kuvendit te Shqipërisë”.