Vijon procesi i rimbursimit për mijëra qytetarë në kuadër të Deklaratës Individuale Vjetore të të Ardhurave (DIVA) për vitin 2025. Drejtoria e Përgjithshme e Tatimeve ka bërë të ditur se Administrata Tatimore është duke vijuar shpërndarjen e fondeve për tatimin e mbipaguar dhe zbritjet e parashikuara për fëmijët.
Deri më tani njoftohet se janë gjithsej 39,940 individë ata që kanë përfituar drejtpërdrejt nga ky proces rimbursimi, i cili mbështetet mbi deklarimet e sakta dhe legjislacionin në fuqi për lehtësimin e barrës fiskale të familjeve.
Ndërsa vlera e fondeve të rimbursimit deri më tani ka arritur vlerën e mbi 6.4 milionë eurove.
Ky vit shënon një risi, pasi është hera e parë që skema e rimbursimit përfshin edhe zbritjet e tatimit për fëmijët nën 18 vjeç në ngarkim.
Administrata Tatimore bën me dije se transaksionet po kryhen në mënyrë të rregullt, duke kaluar fondet direkt në llogaritë bankare të deklaruara nga vetë tatimpaguesit.
Nga skema e rimbursimit tatimor për fëmijët në ngarkim përmes Deklaratës Individuale Vjetore të të Ardhurave (DIVA) pritet të përfitojnë gjithsej 77 mijë qytetarë.
Për çdo paqartësi apo për të verifikuar statusin e rimbursimit të tyre, individët mund të futen në portalin zyrtar e-Albania ose në sistemin e-Tatime, ku gjenden të gjitha të dhënat e detajuara të llogaritjeve të DIVA-s.