Ndryshimet e fundit të bëra në Kuvend për procesin e regjistrimit të pronave i japin mundësinë të gjithë ndërtuesve që kanë ndërtuar pa leje të legalizojnë dhe të hipotekojnë banesën e tyre . Një ndër risitë kryesore që paraqet ligji është regjistrimi i pallateve që prej marrjes së lejes së ndërtimit duke i dhënë kompanisë ndërtuese një certifikatë pronësie të përkohshme, e cila më pas do të përdoret për dhënien e hipotekës për secilin blerës apartamenti.
Ky ligj prek një numër të konsiderueshëm të qytetarëve të cilët më parë e kishin të vështirë deri të pamundur të regjistronin në zyrat e pasurive të paluajtshme banesat e tyre . Ndryshime gjithashtu ka edhe në kontratat e qirasë të cilat tashmë duhet të regjistrohen në Hipotekë. Në rastet kur objekti jepet me qira për një periudhë kohore më të gjatë se 9 vjet, kjo do të bëhet duke kryer ndryshime në Certifikatën e Pasurisë së Paluajtshme.
Në çdo rast, dhënien me qira të një apartamenti, magazine, zyre, etj., noteri do të jetë i detyruar që të bëjë edhe ndryshime në Certifikatën e Pronësisë së qiradhënësit.