Erling Haland po shkatërron çdo lloj rekordi që është vendosur sa u përket golave të shënuar në Ligën e Kampioneve. Sulmuesi i Borusia Dortmund, që kur ka nisur të marrë pjesë në këtë turne, është i pandalshëm para portës dhe po thyen ndeshje pas ndeshje rekordet sa u përket numrit të rrjetave të tundura.
Sot, me dygolëshin e tij ndaj Seviljes, Haland mbërriti në shifrën e 18 golave të realizuara në këtë turne. Diçka mbresëlënsëe, pasi i janë dashur vetëm 13 ndeshje për ta arritur atë, duke shënuar në 11 nga këto sfida, i ndalur vetëm nga Kejlor Navas i PSG dhe Allison i Liverpulit. Një ritëm i pabesueshëm me një gol çdo 55 minuta që e bën atë padyshim një nga lojtarët më interesantë në qarkullim.
Për të kuptuar se sa diferencë ka ai me këdo që e ndjek, mjafton të kuptosh që rekordin e mëparshëm për shifrën e 18 golave e mbante Herri Hejn, të cilit iu deshën 22 ndeshje për ta arritur këtë numër, 9 më shumë se norvegjezi. I treti është një golashënues race si Rud Van Nistelroi, i cili e arriti shifrën 18 pas 24 ndeshjesh të zhvilluara.
Krahasimi i parë që bëhet për Haland është ai me një tjetër të ri si Mbape, por francezit iu deshën 29 ndeshje për të arritur numrin në fjalë. Atij as që i aforhen pastaj disa emra që kanë bërë e vazhdojnë të bëjnë historinë në Ligën e Kampioneve si Shevçenko (31 ndeshje), Levandovski (31), Nejmar (32), Henri (34), Drogba (35), Mesi (35), Raul (37), Salah (40), Eto’o (52) apo Kristiano Ronaldo (54).