Laboratori i analizave të gjakut në Spitalin Bashkiak Mat është tashmë i pajisur me aparatura moderne, duke shënuar një hap të rëndësishëm në përmirësimin e shërbimeve shëndetësore për qytetarët e zonës.
Këto pajisje janë siguruar falë bashkëpunimit mes drejtuesve të spitalit dhe fondacionit “Rotary Club Tirana”. Ceremonia e dorëzimit të aparaturave u zhvillua këtë të enjte në ambientet e laboratorit, në prani të drejtorit të spitalit, Erion Bala, përfaqësuesve të shoqatës, përfshirë presidentin Rozan Osmani, si dhe Nënprefektit të Matit, Hasan Pasha.
Në fjalën e tij, drejtori Erion Bala theksoi se aparaturat e reja të analizave biokimike do t’u mundësojnë qytetarëve matjanë të kryejnë analizat pranë spitalit lokal, duke shmangur kostot dhe kohën e udhëtimit drejt Tiranës apo laboratorëve privatë.
Nga ana e tij, presidenti i “Rotary Club Tirana”, Rozan Osmani, u shpreh se organizata iu përgjigj pozitivisht kërkesës së spitalit për sigurimin e këtyre pajisjeve, duke kontribuar në rritjen e cilësisë së shërbimeve mjekësore në zonë.
Ndërkohë, Nënprefekti i Matit, Hasan Pasha, falënderoi donatorët dhe drejtuesit e spitalit për këtë investim të rëndësishëm, i cili ndikon drejtpërdrejt në përmirësimin e kujdesit ndaj pacientëve. Aparaturat e reja pritet të jenë në funksion të plotë për qytetarët, duke ofruar një shërbim më cilësor dhe bashkëkohor në Spitalin Bashkiak Mat.