Franc Bekenbauer rrezikon jetën nga emocionet e tepërta dhe situata e tij shëndetësore është ajo që për momentin duket se po e mban larg burgut. Legjenda e futbollit gjerman akuzohet prej vitesh se ka qenë pjesë e grupit që organizoi blerjen e votave për të siguruar zhvillimin e Botërorit 2006.
Prokuroria zvicerane hetoi për disa vite me radhë dhe bëri gati dosjen, e cila për shumëkënd tregonte se si Federata Gjermane kishte shpërndarë miliona euro nëpërmjet sponsorëve për të siguruar votat e nevojshme për organizimin e Botërorit, me Franc Bekenbauer pjesë të komitetit organizator.
Por avokatët e Bekenbauer kanë paraqitur dokumente mjekësore të cilat tregojnë se çdo lloj emocioni i fortë, si ai që prodhojnë sallat e gjyqeve, do të kërcënonte seriozisht jetën e Bekenbauer. Gjendja e tij shëndetësore është përkeqësuar ndjeshëm që nga muaji prill dhe sipas diagnozave, edhe kujtesa dhe arsyetimi janë dëmtuar, pasi ka kaluar infarkt. Ndaj është kërkuar që ai të mos merret në pyetje.
Si rrjedhojë, Bekenbauer i cili shihej si një prej protagonistëve kryesorë, tani mund t’ia hedhë pa u lagur nga kjo mesele. Hetuesit kanë kërkuar dokumentacione shtesë për gjendjen e tij, por njëkohësisht kanë bërë të ditur se gjykimi i tij mund të ndahet nga të tjerët që akuzohen se kanë marrë pjesë në dhënien e ryshfeteve.