“Kërcënimi rus është real edhe për Ballkanin”. Kryeministri Edi Rama, në një konferencë për mediat me kryeministren e Finlandës, Sanna Marin, tha se mirëpret anëtarësimin e vendit nordik dhe Suedisë në aleancën ushtarake. Po ashtu Rama tha se Ballkani është një hallkë e dobët, dhe për këtë arsye shtoi Rama, eksperienca dhe fjala e Finlandës ka shumë rëndësi për komunitetin.
“Ne jemi në një fron kundër agresionit rus në Ukrainë dhe Finlanda ka shumë për të na mësuar, pasi për shkak të historisë e pozicionit të vet e njeh shumë mirë agresorin dhe natyrën e tij.
Duke qenë një vend që ka pasur në të shkuarën mundësinë të nxjerrë shumë mësime nga fqinjësia me Rusinë mendoj që ka dhe një zë shumë të respektueshëm për të kuptuar sa e rëndësishme është rezistenca dhe sa e rëndësishme është lidhja që disa nuk duan ta bëjnë mes asaj që ndodhi në Ukrainë dhe asaj që mund të vijë deri këtu.
Në këtë kontekst Ballkani është një hallkë e dobët, delikate dhe për këtë arsye, eksperienca dhe fjala e Finlandës ka shumë rëndësi për të gjithë komunitetin”, tha Rama.