Një avion u rrëzua në Filipine, ku mbetën të vdekur të nëntë personat në bord. Sipas mediave, avioni u rrëzua në një zonë turistike dhe shpërtheu në flakë dhe nga përplasja e tij u plagosën dy persona që gjendeshin në tokë.
Eric Apolonio, zëdhënës i Autoritetit të Aviacionit Civil të Filipineve, tha se aeroplani ishte në një fluturim evakuimi mjekësor nga qyteti jugor Dipolog në provincën Zamboanga del Norte dhe u zhduk nga radari për arsye të panjohura pasi fluturoi mbi Laguna. Avioni ishte menduar të ulej në Manila.
Personat në bord ishin dy pilotë, dy infermierë, një mjek, një pacient, gruaja e pacientit dhe dy persona të tjerë, raportoi policia për mediat e huaja.
Zjarrfikësit dhe një ambulancë mbërritën në vendngjarje për të dhënë ndihmën e duhur.