Bilanci i dy tërmeteve të fuqishme që goditën Venezuelën javën e kaluar është rënduar ndjeshëm. Sipas autoriteteve venezuelase, deri më tani kanë humbur jetën 1.943 persona, ndërsa mbi 10.500 të tjerë janë plagosur.
Presidenti i Asamblesë Kombëtare, Jorge Rodríguez, deklaroi për televizionin shtetëror se ekipet e kërkim-shpëtimit vijojnë operacionet në zonat më të prekura, ndërsa institucionet janë angazhuar për të ndihmuar mijëra familje që kanë mbetur pa banesa.
Sipas të dhënave të “United States Geological Survey” (USGS), dy tërmetet me magnitudë 7,2 dhe 7,5 goditën Venezuelën më 24 qershor, duke shkaktuar lëkundje të forta në një pjesë të madhe të vendit. Tërmetet u ndjenë edhe në disa shtete fqinje, ndërsa pasgoditjet që vijuan në ditët pas fatkeqësisë kanë vështirësuar operacionet e shpëtimit.
Ndërkohë, një vlerësim paraprak i publikuar nga studiuesit e NASA-s tregon se rreth 58.870 objekte, përfshirë banesa, ndërtesa publike dhe infrastrukturë, mund të jenë dëmtuar ose shkatërruar nga lëkundjet sizmike.
Ekspertët paralajmërojnë se përmasat reale të dëmeve mund të jenë edhe më të mëdha, pasi shumë prej zonave të goditura nuk janë inspektuar ende plotësisht.
Autoritetet kanë shpallur gjendjen e emergjencës në rajonet më të prekura dhe kanë bërë thirrje për mbështetje kombëtare e ndërkombëtare. Ndërkohë, mijëra banorë vazhdojnë të strehohen në qendra të përkohshme, ndërsa përballen me mungesën e ushqimit, ujit të pijshëm, shërbimeve bazë dhe frikën nga pasgoditjet.