“Mrizi i Zanave” është një nga restorantet më të famshme shqiptare, i kthyer tanimë në një markë të njohur edhe për të huajt. ‘Mrizi i Zanave’ apo thjesht ‘Mrizi’ është edhe qendër agroturizmi në Fishtë, pranë Lezhës. Një vend i mahnitshëm, por mbi të gjitha me gatime nga më të mirat, me një kulturë shërbimi jashtëzakonisht cilësore.
Tek “Mrizi i Zanave”, i cili ka marrë emrin e veprës poetike të Gjergj Fishtës, mblidhen qytetarë shqiptarë nga të gjitha viset, e të huaj që vijnë për të shijuar kuzhinën tradicionale me produkte ekskluzivisht të zonës.
BBC, Rai Uno, Al Jazera,, Zdf, Finantial Times, Vogue, Corriere della Sera, El Pays, Der Spiegel, etj media ndërkombëtare kanë shkruar për ‘Mrizin e Zanave’ dhe punën e jashtëzakonshme të bërë prej vitesh në këtë qendër agroturizmi. (LEXO KËTU)
Së fundmi, ka folur shqip edhe gjigandi i hotelerisë greke, “Cavo Tagoo Mykonos”, një nga rrjetet më cilësore, më luksoze dhe më të famshme të ishullit magjepsës grek, Mykonos.
“Jeni më të mirët”, ka komentuar @Cavotagoomykonos në një postim në instagram të ‘Mrizit’ ku stafi ka reaguar në lidhje me komentet e gazetarit Ylli Rakipi , i cili ka ironizuar disa të huaj të cilët janë shprehur se ky restorant është nga më të mirët në botë.
Faktet tregojnë se ‘Mrizi i Zanave’ është në fakt një nga më të mirët. I cilësuar i tillë nga rrjetet më prestigjoze mediatike të huaja dhe së fundmi edhe nga ‘brandet’ më të mëdha të hotelerisë dhe turizmit elitar.
Tirananews.al