Shumë njerëz mezi presin të veshin një bluzë apo fustan të sapoblerë, por dermatologët këshillojnë që rrobat e reja të kalojnë fillimisht në lavatriçe. Edhe pse duken të pastra, ato mund të përmbajnë mbetje kimikatesh nga procesi i prodhimit, si edhe të jenë ekspozuar ndaj shumë duarve gjatë transportit dhe shitjes.
Sipas ekspertëve të cituar nga TIME, një nga problemet më të zakonshme janë ngjyruesit e përdorur në pëlhurat sintetike, si poliesteri dhe najloni. Këto substanca mund të shkaktojnë dermatit alergjik të kontaktit, një reaksion që shfaqet me skuqje, kruarje dhe irritim të lëkurës disa ditë pasi rrobat janë veshur. Djersa dhe fërkimi me lëkurën e bëjnë më të lehtë çlirimin e këtyre ngjyruesve nga pëlhura.
Përveç ngjyruesve, rrobat e reja mund të përmbajnë edhe mbetje të kimikateve të përdorura gjatë prodhimit për të parandaluar rrudhosjen, mykun, njollat ose për të fiksuar ngjyrat. Disa studime kanë identifikuar përbërës si quinoline, nitroanilinat dhe benzotiazolat, të cilët janë lidhur me efekte të mundshme negative për shëndetin, megjithëse ndikimi i tyre te njerëzit ende po studiohet.
Një arsye tjetër për t’i larë është higjiena. Nga fabrika deri në raftin e dyqanit, një veshje kalon në shumë ambiente dhe preket nga shumë persona. Edhe nëse blihet online, nuk ka garanci që produkti nuk është kthyer më parë nga një klient tjetër. Larja ndihmon në largimin e papastërtive, baktereve dhe mbetjeve të mundshme nga transporti dhe magazinimi.
Ekspertët rekomandojnë që rrobat e reja të lahen sipas udhëzimeve në etiketë, zakonisht me ujë të ftohtë ose të vakët dhe detergjent të butë. Veshjet me ngjyra të forta duhen larë veçmas herën e parë, pasi mund të lëshojnë bojë dhe të njollosin rroba të tjera.
Edhe pse një larje nuk eliminon plotësisht çdo substancë kimike të përdorur gjatë prodhimit, dermatologët theksojnë se ajo ul ndjeshëm ekspozimin ndaj tyre dhe zvogëlon rrezikun e irritimeve të lëkurës. Për këtë arsye, këshilla e tyre është e thjeshtë: para se të vishni një rrobë të re, lajeni fillimisht./TIME