Udhëheqës nga e gjithë bota, mes tyre presidenti i Francës, Emmanuel Macron, kancelari gjerman, Friedrich Merz, si dhe kryeministri i Britanisë së Madhe, Keir Starmer, u mblodhën në Mynih për Konferencën e Sigurisë, takimin më të madh në Europë për çështjet e mbrojtjes dhe sigurisë.
Pyetja që dominon mbi tryezë: a është ende Amerika një aleate e fortë e Europës?
Fjalimi më i pritur ishte ai i Sekretarit amerikan të Shtetit, Marco Rubio. Pritej të shihej nëse ai do të përsëriste kritikat e ashpra të bëra më herët nga zëvendëspresidenti JD Vance ndaj vendeve europiane, apo do të mbante një qëndrim më të butë.
Në fillim, fjalimi i tij u duk kritik. Ai sulmoi tregtinë e lirë, emigracionin masiv dhe politikat mjedisore, duke thënë se disa prej tyre po dëmtojnë ekonominë amerikane. Ai kritikoi edhe OKB-në duke e akuzuar se nuk ka arritur të ndalë luftën në Gaza dhe në Ukrainë.
Por më pas, Rubio theksoi se fati i Amerikës dhe i Europës është i lidhur ngushtë dhe se lidhja përtej Atlantikut nuk ka përfunduar dhe as nuk duhet të përfundojë.
Ai tha se SHBA-të do të mbeten të lidhura me Europën. Vlerësoi kulturën e saj, duke përmendur figura të njohura të artit dhe muzikës.
Megjithatë, ai shtoi se Amerika nuk ka ndërmend të qëndrojë thjesht si vëzhguese e dobësimit të Perëndimit.
Reagimi në sallë ishte përgjithësisht i mirë; rreth gjysma e të pranishmëve u ngritën në këmbë për ta përshëndetur. U ndje një frymë lehtësimi, pas tensioneve të muajve të fundit, përfshirë vendosjen e tarifave dhe debatet mbi Groenlandën.
Përfaqësuesja e lartë e Bashkimit Europian për politikën e jashtme, Kaja Kallas, tha se mesazhi ishte inkurajues dhe se Europa mbetet e rëndësishme për SHBA-të. Megjithatë, ajo pranoi se ka ende dallime në disa qëndrime.
Ndërkohë, shumë zyrtarë europianë shprehin pakënaqësi që presidenti Donald Trump nuk po ushtron më shumë trysni ndaj Rusisë për t’i dhënë fund luftës në Ukrainë, e cila po hyn në vitin e 5-të të saj.